Prome Mercado pa Profesionalnan den cuido & guia di mucha di Fundacion Pa Nos Muchanan: un exito rotundo!
Oranjestad,-- Na aña 2006 y 2008 FPMN a organisa un seminario 'Ora bo ta wak pa yiu di hende' pa lidernan di centro di mucha. Durante e seminarionan aki, a duna 3 workshops y a tene un exposicion chikito di un compania di buki y coi hunga. Mirando e exito di e seminarionan y e interes grandi di lidernan pa curso y workshops, a bin cu e idea pa organisa un mercado pa profesional den cuido y guia di mucha. Proposito di e evento aki ta pa trece informacion, material y actividadnan destina pa mucha mas serca di esnan cu diariamente ta traha cu nan. Den e mercado lo mustra productonan interesante pa e lidernan tuma nota di dje y actividadnan creativo y recreativo pa haci cu mucha. Den coneccion cu 20 aña existencia di Fundacion Pa Nos Muchanan (FPNM), cu apoyo di Aruba Way Foundation, a ofrece un mainta cu diferente workshops pa lidernan den cuido y guia di mucha pa asina dunanan hopi informacion y guia riba tereno di bienestar general di e mucha y e lider.
E promer “Mercado pa profesionalnan den cuido & guia di mucha” a tuma lugar den ballrooms di Westin Aruba Resort.
Oradornan pa e mainta aki tawata sra. Zuhayla Croes, coordinador pedagogico (topico: E importancia di hunga y co'i hunga), sra.Luty Martinez, docente, (topico: E mayor, bo aliado), sra. Annemieke Dijkhout, fysioterapista, (topico: Lider, cuida bo lomba); sra. Desiree Correa, docente spanjo/escritor, (topico: Lesa buki & Kashi di popchi); sra. Enid de Kort, terapista di famia, (topico: E salud mental di e lider: un vision sistemico); sr. Jan Hubert, docter na Cuido di Salud Hubenil, (topico: Maneho di malesa y sanger den centro di mucha); sra. Martha Echeverry, educador special/antropologo, y sra. Uleike Tromp, terapista den 'applied behavior analisis' (topico: Comportacion di mucha den grupo) y for di Corsow, sra. Sharissa Naipal-Lewellyn, (topico: Siña activo).
E workshops a wordo atendi pa lider y studiante, representando 46 centro di mucha di 0 pa 12 aña. Comentarionan di e participantenan tabata sumamente positivo.
Despues di un mainta educativo y informativo Minister Michelle Hooyboer-Winklaar a habri merdia e Expo oficialmente y a dirigi palabranan di reconocimento pa e profesion.
E exposicion tawata tin e aspecto recreativo y creativo caminda diferente instructornan, companianan y instancianan a presenta nan actividadnan, producto y servicio cu ta relevante pa cuido y guia di mucha.
Fundacion Pa Nos Muchanan ta desea di gradici tur esnan cu a aporta na e exito di “Mercado”. Un danki special ta bai pa Aruba Way Foundation, kende ta e patrocinador mas grandi. Alabes pa Westin Aruba Resort y Quick Finder Services, pa nan tremendo yudansa.